Tuesday, May 31, 2011

اضائت لمبة التنبيه في تابلوه سياره صديقي معلنه قرب انتهاء البنزين بالسياره .. فما كان من صديقي ان قال متململا : عاوزين بنزين . وماله... رددت انا .. فيه محطه هنشوفها كمان شويه .
ولما كنا في عجله شديده من امرنا فقد عرج صديقي الي اول محطه صادفناها علي الاوتوستراد وبالمصادفه كانت محطة ( وطنيه ) التي اعرف انها من مشروعات جهاز الخدمه الوطنيه للجيش واعرف ايضا ان من يقوم بالعمل داخلها من افراد القوات المسلحه
  فول ٩٢ قالها صديقي للعامل الذي اتي اليه ....   لا والله يابيه ٢٠ لتر بس .. رد العامل 
:ايه الزفت ده كمان ازمه في البنزين ؟ داحنا لسه بنحاول مع السولار .. رددت تلك الكلمات ولكن في عقلي 
يارب استرها علي البلد دي ... داحنا غلابه يارب 
هي ازمة البنزين دي بدإت امتي ؟ سألت العامل 
مش عارف والله بس دي تعليمات
ايوه يعني كل المحطات مافيهاش غير ٢٠ لتر بس ؟
والله مش عارف بس دي اوامر المدير .... قالها العسكري مبديا بعض التذمر ومحاولا ان يمضي لعمله 
ماشي يا معلم مافيش مشكله... قالها صديقي ثم نظر لي مبتسما  وقال الظاهر الواد مخنوق من الاسئله دي

 ايوه بس ازاي يبقي فيه ازمه في البنزين ٩٢ المفرو ض تبقي في ٨٠ مش في ده ... رددت انا وقد بدأ الفأر يلعب في عبي

خدمه تانيه يا باشا ؟ سأل العسكري 
شكرا .. من فضلك عاوز فاتوره ... رد صديقي
ادار السياره وبدأت السياره في التحرك والخروج من المحطه للعوده الي الطريق مرة اخري
استني استني ... وقف العربيه يا وليد .. هتفت اليه
ايه في ايه مالك ؟ قالها صديقي مذعورا
ولا حاجه انا عاوز اقابل المدير... قلتها وانا التفت الي احد الافراد العاملين بالمحطه من الشباك المجاور لي 
رفع العامل يده مشيرا الي مكان السوبرماركت الموجود بالمحطه قائلا .. سياده العقيد جوه
ترجلت من السياره وما ان اقتربت من المكان الذي اشار اليه العامل حتي رأيت ضابطا برتبه عقيد خارجا من السوبر ماركت متجها ناحيتي ...... مساء الفل 
بادرته مبتسما
اهلا اهلا ،،،، مش حضرتك...   قاطعته 
ايوه انا مساء الفل ... ممكن اعرف الازمه بدأت امتي ؟
ازمه ايه؟ مافيش ازمه ولا حاجه . قالها العقيد
ايوه يافندم بس مافيش اكتر من عشرين لتر بس .... رددت بدوري
آآآآآآه الحقيقه ده امر شخصي مني لان ماينفعش واحد بيمون عربيته بميت جنيه ومش عاوز يدفع جنيه واللا اتنين بقشيش.... قالها العقيد بكل بساطه وموضوعيه
لا مش فاهم حضرتك ... قلتها انا في بلاهه
انا كنت بادفع اكراميه لسواق التنك اللي بيمون المحطه اربعين جنيه دلوقتي بادفع ١٦٠ جنيه... قالها بنفس الموضوعيه والبساطه
مش فاهم ... قلتها انا بنفس البلاهه
البنزين اللي انا باجيبه المحطه من اجود انواع البنزين وبادفع ارضيه (إكراميه يقصد ) ١٦٠ جنيه علي كل نقله ومافيهاش حاجه يعني انك تدفع جنيه واللا اتنين وانت بتمون عربيتك بميت جنيه.. اعادها العقيد مره اخري 
الله ؟ هو البقشيش ده بيتجمع من الافراد بعد كده وهو اللي بيسدد النفقات دي ؟ تسائلت متعجبا 
بالظاااااااااااااااابط  فا مش معقول يعني.. قاطعته بسرعه 
ايوه ايوه مش معقول تمون عربيتك بميت جنيه وماتدفعش جنيه واللا اتنين مفهوم .. قلتها قبل ان يعيدها علي مره اخري
بس علي فكره لو عاوزتفول تحت امرك ... قالها متصدقا علينا
لا شكرا جزيلا ..... قلتها ومددت يدي بالسلام عليه وكذلك فعل صديقي ومضينا الي السياره مره اخري
وتقافزت الي عقلي عشرات الاسئله بعد حديثي مع سيادته وقلت لنفسي .. ياتري بكره جايبلنا ايه تاني؟؟؟؟